hann tómas minn

í kvöld sat ég með syni mínum og aðstoðaði hann við heljarinnar teiknimyndaverkefni um vesturfarana, sem hann hefur eytt drjúgum tíma í og ætlar að sýna bekknum í samfélagsfræði á morgun. vinur minn einn, sem sér ýmislegt sem aðrir sjá ekki, sagði eitt sinn við mig að þótt mitt listastúss væri vissulega merkilegt skyldi ég bara bíða og sjá son minn blómstra í framtíðinni. þar færi listamaður sem mun láta til sín taka.

að sjá tómas vinna við tölvuna og koma hugmyndum sínum á koppinn er algerlega stórkostlegt. hann er efnilegur svo ekki sé meira sagt...

... sagði faðirinn fullur af stolti, ýtti á "vista og birta", og lagðist glaður og þakklátur í neðri kojuna. róandi andardráttur efri kojunnar, þar sem strákurinn hans lá, ruggaði honum í svefn.

Athugasemdir

[siljarut (IP-tala skráð) 3.11.2006 kl. 10:35]

oh þið eruð svo sætir feðgar:)

[Sigrún Friðriksdóttir, 3.11.2006 kl. 12:23]

Til hamingju með soninn, það er fátt sem hlýjar hjartanu eins mikið og að vera stoltur af börnunum sínum.

Kær kveðja Sigrún.

[Heiðar (IP-tala skráð) 3.11.2006 kl. 14:29]

Til hamingju með flottar tilnefningar í Edduna.  Núna er af og frá það þú geti dissað hana! hehehe