aftur í berlín

vonandi flutti ég mitt hafurtask í síðasta sinn milli staða hér í berlín í gærkveldi. ég er sumsé kominn í íbúð, sem er mín þar til ég sný aftur upp á sker. sú hefur áður komið við sögu í þessu bloggi, jú, hún er einmitt þessi með baðkarinu í eldhúsinu. amelía tók þá ákvörðun fyrir stuttu að flytja til unnusta síns og hyggst leigja íbúðina í vetur. ég hef hana meðan ég þarf. 

ein sterkasta upplifun mín í riga... ja reyndar einhver sterkasta upplifun mín í alllangan tíma, og toppar flest það sem ég hef orðið vitni að hér í berlín, var heimsókn mín í rússnesku orthodox kirkjuna í riga. þar gekk ég beint inn í messu. og það er nú þannig að ég hef alltaf heillast mjög af kórsöng slíkra athafna. tónlistin, staðurinn, andrúmsloftið mettað reykelsisilm, allir rússarnir bugtandi sig og krossandi fyrir almættinu, kyssandi líkneski og myndir. ég var mjög snortinn.  þar var boðinn til sölu geisladiskur með tónlistinni og ég keypti einn slíkan. hann hljómar einmitt undir þessum skrifum.

nú held ég áfram þar sem frá var horfið. aftur í berlín.

í kvöld fæ ég gest frá íslandi.