þá nú og þegar

ég var að aðstoða son minn við próflærdóm í kvöld. lásum í sameiningu námsefnið í landafræði. ekki laust við að manni fallist hendur að fá staðreyndirnar svona beint í æð. þið vitið, þessa hluti sem maður lærði sjálfur og á að þekkja en hefur leyft sér að gleyma, rétt eins og þeir skipti ekki máli:

Skógar eru ruddir á stórum svæðum til að fá beitiland fyrir nautgripi. Í Suður- og Mið-Ameríku eru reistir stórir búgarðar til nautgriparæktar. Regnskóginum er breytt í beitiland. Kjötið er flutt út til iðnríkjanna í norðri og útflutningstekjurnar renna til erlendra fyrirtækja og fámenns hóps innlendra manna. Regnskógur er einnig ruddur til að fá hráefni handa trjávöruiðnaðinum. Aftur eru það iðnríkin sem taka til sín hráefnið. Í Suðaustur-Asíu er mikil ásókn í alls konar eðalvið. Tekk og aðrar viðartegundir verða að húsgögnum í Japan, Bandaríkjunum og Evrópu.

Horfinn regnskógur verður ekki endurheimtur í fyrirsjáanlegri framtíð...

þegar ég lærði landafræði, og það eru komin þó nokkuð mörg ár síðan, minnir mig að regnskógarnir hafi líka verið í hættu. sirkabát einn fótboltavöllur á sekúndu, eitthvað rámar mig í slíka statistík. ástandið hlýtur að vera ennþá svartara nú. eða hvað? hugtakið "global warming"  virðist æ meira áberandi. mig minnir líka að þá, eins og nú, hafi okkur saklausum nemendum verið bent á að þörf væri á úrræðum, og að það væri, með samstilltu átaki, möguleiki að snúa við blaðinu.

það væri fróðlegt að fá að skyggnast í landafræðinámsbækur barnabarnanna...    

Athugasemdir

[Guðrún Ragna (IP-tala skráð) 22.5.2007 kl. 19:22]

búin að bookmarka bloggið þitt. Þetta eru merkilegar pælingar varðandi landafræðina. Þegar maður lærir þetta sem krakki eru hlutirnir svo fjarlægir að þeir gætu alveg eins verið að gerast á annari plánetu. Maður er ekki farinn að sjá heiminn sem heild eða hversu lítill hann er. Sjálf man ég ansi fátt um útflutning og innflutning mismunandi landa, eitthvað sem skipti engu máli og maður lærði bara eins páfagaukur. Þessar kennslubækur eru örugglega meira fræðandi fyrir foreldrana heldur en börnin.

(hljóðstelpan með bumbuna)